قصة جميلة
أنا ما دخلني ها ، هوي جاب الوجع لراسه
😐 كنت متربعة عالسجاد ومحلاني وبتابع TV ، من أول ما فات جوزي ، قلي رفيقنا ولدت مرته من أسبوع لازم نروح نباركله ...
جهزنا حالنا وجهزنا أمورنا والهدية ورحنا ، دقينا الباب فتحلنا جوزا ، على أهلا وسهلا تفضلوا قعدوا هلق بتجي المدام ...
مافي 10 دقايق طلعت المدام الولدانة من أسبوع ، أنا كنت أخدة وضعية الأنيقة الرشيقة أم ريحة بارفان ، مو متل ريحتها حليب وولادة
😎 طلعت وحدة أخر طرز طويلة ، شقرا ، نحيفة ، وصوتا ناعم وقالت مسا_الخير
😊 سلمت علينا وقعدت جنبي
😑 إينو قعدت جنبي ، وك هاي دمرتني ، موتتني ، حسستني بنلعب لعبة أوجد الفوارق العشرة ، لعبة احزر من الحسناء والوحش
طلع شكلي جنبها متل جوال الآيفون وأنا النوكيا
😢 كل شوي اسحب كرشي واشفطو ، أحتراما" لبطنها المشدود يلي ما كنت أعرف كيف أختفى بأسبوع
😣 بس طلعنا من عندون جوزي قالب خلقتو ومشي قدامي 3 خطوات ويستعجل ، قلتلو لك شوباك الدنيا ليل ما خايف عليي يخطفوني أو يصرلي شي ، قلي ع شو والله شكلك بيبعد الإرهاب عنك 500 متر
لك انتي الصاروخ اذا اجا عليكي بغير مسارو ويقول حرام يشتغل بهالصاروخ 1000 عامل ويروح خسارة ع هاي ..
هلق عيب الواحد يحكي بس بربك هداك منظر وحدة ولدانة ولا أنتي الولدانة ، شو ناقصك ما تشتري متلها وتلبسي انا مو مانعك ، يعني لا تزعلي مني انتي أهتمامك بنفسك محدود محدود ، ومشي وراااح قدامي
مشيت_وراه_أحكي_حالي
أنا يلي كنت وفر عليه حق مناكير ومكياج وماسكات كرمال اشتري شي اكتر أهمية للبيت
انا يلي كنت وفّر عليه حق لبس كرمال ما ينقص شي ع ولاده
وآخر شي بقلي أهتمامك محدود محدود ، والله لخلي طريقك مسدود مسدود مسدود ...
نمت وانو عادي نوبروبلم
😎 تاني يوم كتبتلو واتس وهوي بالشغل يجبلي 4 بيضات
طحين
عسل
فانيليا وخميرة
قلي : ياي في كاتو اليوم أنا رح جيب البيبسي
😍 مارديت عليه ، بس جابهم غبت ساعة بالمطبخ وطلعت لعندو
قلي : شوهاد يلي بوجهك
😱 قلتلو ماسك البيض وطحين والعسل ، هاد لإعادة شباب البشرة ونضارتها قلي : طيب يا أم نضارة ، تعي نشرب قهوة من تحت دياتك الحلوين
😍 قلتلو : سوري منك القهوة فيها كوفايين بتعمل قلق وبتزيد نسبة التجاعيد والسواد تحت العين ، صح قبل ما روح نام لا تنسى بكرة تاخد سلفة عن الراتب لانو انا سجلت بالجيم وقررت أنحف ، يله بينوي
😗اليوم يلي بعدو ، جهزت غدى وقلي تعي تغدي معي
قلتلو : لا مستحيل هالاكلة بذات فيها كتير كالوريز ، مو ناقصني شحوم ودهون
🙂عالسهرة قعدت شوي معو منكرت إضافير رجليي وايديي وقعدت ، قرب لعندي قلي الله حيو مرتي تتمنكر
😍 قلتلو : على سيرة تتمنكر اتدينت من النوفيتيه يلي حدنا 10 ألوان مناكير طلع حقون 7000 بكرة ما تنسى تدفعلو لانو ما زاد معي مصاري
😊 بلع ريقو وقال أي من عيوني ، حط ايدو ع خدي
قلتلو : ايدددددددك ع الهايلايتر خربتو يازلمة
😣رفع ايدو وحطا ع شعراتي ، قال شو حلوين
قلتلو : لاااااا تقرررررب عليهون ضليت ساعة اسشور فيهم شيل ايدك
🙂 رايحة حط قطرة لعيني مشان تضل محافظة على نقائها ولمعتها وبياضها ، أسهر لحالك بينوي
😘 عفكرة انا بعد ما شفت حالي بعد الاهتمام بنفسي صرت غير شكل حبيت حالي كتير ، وكبرت الخسة براسي
بعد_10 أيام بعد ما هلكتو مصاريف ومكياجات وماسكات ، اجا ع البيت قال شو الغدى ، قلتلو شوربة ماعاد ضل معي مصروف للبيت ، انتا قلتلي اشتري كلشي ناقصك مالي مانعك ، أكل من تم ساكت ونام شوي
عالسهرة وانا عاملة حالي موديل ، قلي نسهر على فيلم ع mbc2 باين حلو
قلتلو : لا بعد العشرة عندي ماسك الليل وخيار للعيون ، قلي طيب تعي عدي حدي نتطلع على باب الحارة لسا الساعة 8
قلتلو : لازم اعمل شوية يوغا ، الراحة النفسية بتنعكس سلبيا على نقاء البشرة وتوحد لونها ، ورحت ع الغرفة وصرت راقبه كيف رح يجن ، لحقني
😂 وانا بعمل يوغا ، مسكني من أيدي شدني عالصالون قلي مرتي خلص بكفي
شال الحلقات من أدنيي وشلفهون
مسح الحمرة بالبشكير يلي فوق الصوبيا
نكش شعراتي
قلي بحبك هيك ، بحبك تقعدي تفصفصي بزر معي وتغبي شاي ، أصلا" أصلا" والله اللقمة ما بتنزل اذا انتي ما بتكوني حدي وبتقليلي دوق هالمكدوسات والزيت يشرشر من ايديكي ، بلله رجعي متل ما كنتي بعفويتك ، بفجعنتك ، بكرشك ، بروحك الحلوة
😢 قلتلو: ليش انا السبب مو انتا بلشتلي واهتمامك بنفسك محدود محدود
😏 قلي : إينو محدود والله حلوة لو كنتي عبود
😂وبالجيبة ما عاد في نقود
😂ومابدي الجمال اذا قلبك عني مفقود
😂 تعبت وانتي خايفة على شعرك المفرود
😂 وعيناها سبحان المعبود
😂وطريقك يا ولدي مسدود مسدود مسدود
😂 ضحك هو ، وضحكت أنا ، وضحك الجميع ، وضحك عبد الحليم حافظ ، وحطينا عشا وقمّرنا رغيفن خبز عالصوبيا وسفقنا 6 بيضات وعلبتين مرتديلا و قطرميز مكدوس أشقر ،